Traduko: Barry Friedman
IRU TRANKVILE meze de la bruo kaj la hasto, kaj memoru tian pacon, kia povas esti en silento. Laŭeble, sen kapitulaco, estu en bonaj rilatoj kun ĉiuj personoj.
Diru vian veron kviete kaj klare; kaj aŭskultu la aliajn, eĉ la stultulojn kaj malklerulojn; ankaŭ ili havas sian rakonton.
Evitu laŭtajn kaj agresemajn personojn; ili estas ĉagrenaj al la spirito. Se vi komparas vin kun aliaj, vi povas iĝi vana aŭ amara, ĉar ĉiam estos pli grandaj kaj malpli grandaj personoj ol vi mem.
Ĝuu viajn atingojn kaj ankaŭ viajn planojn. Restu interesita pri via propra kariero, kiom ajn humila; ĝi estas vera posedaĵo en la ŝanĝiĝantaj sortoj de la tempo.
Estu singardemo pri viaj komercaj aferoj, ĉar la mondo estas plena de ruzo. Sed ĉi tio ne blindigu vin pri kia virto ekzistas; multaj personoj strebas al altaj idealoj, kaj ĉie la vivo estas plena de heroeco.
Estu vi mem. Precipe ne ŝajnigu amon. Nek estu cinika pri amo; ĉar antaŭ ĉia sekeco kaj elreviĝo, ĝi estas ĉiusezona kiel la herbo.
Prenu afable la konsilon de la jaroj, gracie forlasante la aferojn de juneco.
Nutru forton de spirito por ŝirmi vin en subita malfeliĉo. Sed ne afliktiĝu per malhelaj imagoj. Multaj timoj naskiĝas de laceco kaj soleco.
Preter saniga disciplino, estu milde kun vi mem. Vi estas infano de la universo ne malpli ol la arboj kaj la steloj; vi rajtas esti ĉi tie.
Kaj ĉu aŭ ne estas klare al vi, sendube la universo disvolviĝas kiel ĝi disvolviĝu. Estu do je paco kun Dio, kia ajn vi konceptas Lin. Kaj kiaj ajn viaj laboroj kaj aspiroj, en la brua konfuzo de la vivo, konservu pacon en via animo. Kun sia tuta falsaĵo, pezlaborego kaj rompitaj sonĝoj, ĝi estas ankoraŭ bela mondo. Estu gaje. Strebu esti feliĉe.